Tikves Vranec 2010 Special Selection

Да бидам искрен, бев скептичен окулу целата фама на Паркеровите 90 поени за вранецот на Тиквеш. Знаејќи како функционира маркетингот и каква „ѕверка“ е Филип Камби, мислев дека повеќе е напумпана работата отколку што вреди виното. Но, сум се излажал.
Вранцот на Тиквеш СС 2010 е најдоброто вино што сум го купил за 5 евра. Нема подобро ни да најдете на македонскиов пазар, за тие пари е чисто задоволство во чаша.



Грозјето за овој вранец доаѓа од лозови насади стари помеѓу 30 и 60 години кои се наоѓаат на надморска височина од 450 метри, тоа споено со врвното мајсторство на Камби и имаме одлично вино.
Бојата прекрасна рубин црвена, класика вранец. Букето на почеток малку затворено, но по пет-десет минути во чаша е фантазија. Вишна, сува слива, калинка, капина, брусница, комплексно и хармонично. Вкусот само продлжува тамо каде што мирисот застана. Суви и свежи овошки, надополнети со прекрасното средно тело и меки танини. Финишот е долг и ве тера повторно да ја кренете чашата. И сето ова за 310 денари, навистина вреди.
Да беше виново 500-600 денари, можеби ќе најдев некоја мана, вака обавезно ставам 3-4 флаши во визба да видам како ќе се развива во наредните години.
Топла препорака и немојте да пропуштите одлично вино за мали пари, тоа е реткост кај нас.

Chateau Kamnik Winemakers Selection 2009

Шато Камник Winemakers Selection 2009 е купажа од сортите Каберне Совињон, Санџовезе и Каберне Франк, која и не баш добро им функционира.
Цената од окулу 500 денари е премногу за ова вино, а еве зошто.
Мирисот е вештачки. Се чуствуваат ароми на суви црвени овошки, не сепак остава впечаток како да се работи за вештачки мириси. Мирисот го “спасуваат“ дабот и нотите на кафе. На вкус слична приказна. Средно тело, “срушени танини“ краток и горчив финиш (среќа што е краток).
Ова е прво вино од Шато Камик кое ме разочарува.
Оцена и не заслужува, едноснавно подпросечно.

Редок вид на јачмен за “специјално“ виски

Дестилеријата Arran во соработка со Агронмскиот институт од Оркни произведе виски од редок вид на јачмен кој бил донесен и култивиран во Шкотска од викинзите пред повеќе од 1000 години.



Ќе бидат произведени само 5800 шишиња од вискито Arran Malt Orkney Bere, кое е “зреено“ осум години во буриња кои предходно содржеле бурбон и ќе се продава по цена од 47,99 фунти.

Glenfiddich 15 years old

Се сеќавате на натпреварот Шкотска - Македонија 1:1?
Јас знам дека не заслужено шкотите измкнаа бод, но затоа многу добро се сеќавам на Гленфидих петнаеската што ја дегустирав таа вечер за прв пат.

 

Специфично за овој сингл малт е тоа што е користен солера системот кој се употребува кај шпанското шери. Тоа значи дека во големи буриња (vats), во случајов на Гленфидих тоа е нешто повеќе од 700 литарско буре направено од Орегонски бор, се чува виски кое е предходно зреено најмалку 15 години во помали 220 литарски буриња од бурбон, шери или нови буриња од американски даб. Финтата е во тоа што во ова солера буре вискито е оставено да одлежи некое време за да се спојат сите различни вкусови и мирис кои се во него и потоа се вади од него, но како се вади се додава ново 15 годишно виски во големото солера бура така што константо во бурето има виски кое е подолго време одлежано.



По вадењето од солера бурето вискито помиува уште неколку месеци во дабови буриња наречени oak Marrying Tuns, за повторно спојување на вкусовите и мирисите. После сето ова вискито е спремно за влаширање и тоа е сеуште официално 15 годишно виски.

Glenfiddich 15 y.o.


Мирисот на суви овошки е доминантен, сува смоква, суво грозје, извонредно избаласирани со мирисот на карамела и мока кафе. Извонредно комплексен нос.
Вкусот е исто така одличен, повторно сувата смоква е носител заедно мед, црно чоколадо зачинето со бибер и малку чили. Феноменално.
Финишот е причично долг со примеси на тофи, црн бибер и клека (juniper berry).
Одлично виски кое од скоро може да се најде и кај нас и искрено го препорачувам за уживање во ладните зимски денови.
Оценка: 89/100

Скопје, дожд и Glenfiddich!

Конечно залади, заврна, малку да здивнеме во нашиов град насушен. Вардар се претвори во поток, ослабев 5 кила и ми никна бело вино у стомак. Шетав низ град кога почна да роси, време е за едно виски, сингл малт виски. Но каде со сигурност има сингл малт у Скопје? Викам ќе одам на сигурно, фенси, тренд местата мораат да имаат малку повеќе „ексклузива“ од останатите и се упатив кон едно кафуле, бар или што и да е, во центарот на градот.
Седнувам, менито пред мене, отворам и …. традиционален виски???



Хм, интересно. Но она што го прочитав подолу беше лошо, прилично лошо, користење на виски термини, поготово во кафуле коге сигурно го посетуваат многу странски гости, а најверојатно и шкоти и ирци кои сигурно слатко се изнасмеале.



Одиме по ред.
1.Glen Grant (pure malt)
Pure malt или Vatted malt едно, а Glen Grant The Major’s Reserve кој најверојатно го нудат е сингл малт виски, виски кое е произведено и одлежало во една дестилерија, голема е разликата од pure malt до single malt.
2. Cutty Sark (malt scotch)
Cutty Sark e blended whisky што значи дека освен јачменов малт се користат и други житарки во добивањето на дестилатот. Malt scotch како што е наведено во менито наведува дека е single
malt whisky кое Cutty Sark го имаат во понуда но цената сугерира дека се работи за основиниот блед. Збунувачки за обичниот љубител, смешно за познавачите на вискито.
3. Clenfidish (single malt)
CLENFIDISH е најверојатно Glenfiddich, најпродаваното сингл малт виски во светот, кое нашиве трендсетери успеаа тотално да го утнат неговото име.
Понатаму  е се јасно и гласно, точно, браво!
Си порачав еден CLENFIDISH бидејќи го здогледав на шанкот неотворен, без лед обавезно и се спремив за уживање.
Надвор пријатно ветре, мирис на дождот, плоштадот полу празен. Јас со Спејсајд виски во мојата рака послужен во класична виски чаша (tumbler) во оваа наша вукојебина пробувам да живуркам нормално, …..ах!
Си велам, можеби ич не им е гајле пошто и онака сингл малт у Скопје се пие со две-три коцки лед или сечен со кока-кола. Битно е да е скупа пијачката.
На здравје!

Скопје, дожд и Glenfiddich!

Staropramen

 

Старопрамен во превод значи „стар извор“, тоа е втора по големина пивара во Чешка формирана во 1869 и се наоѓа во областа Смичов во Прага.

Пролет, кафанче, мезе и Старопрамен, тоа е добитната комбинација. Ова пиво како и сите масовно произведувани пива не се наменети за дегустација или пак ќе ви овозможат некое посебно уживање, но сепак мора да бидат дојстојно направени да се добар партнер со храна и муабет.

Пивото прави убава пена која брзо исчезнува.
На мирис: Јачмен, свежо печен леб, свежи цитрусни ноти и многу малку хмељ и малку од лошиот „cat piss“ мирис.
Лошиот мирис се создава кога по флаширањето пивото ќе биде изложено на директна светлина. Ова се случува со повеќето масовно призведувани пива кои при транспорт или поради лошото чување во маркетите, магацините и угостителските објекти во пивото се создава овој сулфурест мирис. Мирисот не е со таков интензитет да ви се слоши или да не можете да го пиете пивото, дури и тешко се забележува, но доколку сте ентузијаст и голем љубител на пивото мирисот веднаш ќе го почиствувате. Пивата со прозирна или зелена амбалажа се потенцијални „миризливи“.
Вкус: Средно тело, кремасто со средна карбонизација. Слад, киселкасто гочлив хмељ и чист финиш со прикриени ноти на тостиран леб.
Се вкупно солидно пиво кое може да се конзумира во текот на целиот ден, во комбинација со храна и секако со добро друштво.
Уживајте!
Staropramen

Bavaria Premium Beer

 

Баварија е втора по производство пивара во Холандија чие годишно производство изнесува окулу 580 милиони литри пиво годишно. Пиварата е формирана во 1719 година во Лишхаут (Lieshout) во близина на Ајндховен и на почетокот произведувале окулу 88 буриња што е окулу 14400 литри пиво годишно. Во 2007 Евопската комисија ги обвини и казни Хајнекен, Гролш и Баварија за учество во картел на цените т.е. создавање на монопол врз цените на пивото.
Е сега малку за самото пиво.
Bavaria Premium Beer 5 % abv.

Пивото е со светло жолта боја со убава пена која кратко трае.
Мирисот веднаш сугерира дека не се работи за сладко пиво, квасец, јачмен, црн леб, свеж лимон.
На вкус прво доаѓаат свежите ноти на лимон, јаболко и некој чуден металест вкус. Јачменот, лебот и хмељот следат потоа и водат кон брашкаст послевкус кој потсетува на мелени житарки.
Се вкупно ова е интересно, освежително пиво и верувам ќе им се допадне на сите оние кои не сакаат сладко пиво.
Цената му е 50 ден. за лименка од половина литар и сметам дека е сосема пристојна.
На здравје и уживјте.
Bavaria Premium Beer

Chateаu Kamnik Montepulciano 2009

 

Врти, сучи пак Шато Камник.
Ова вино го пробав првпат на Виноскоп минатата година и си купив 3 флаши. Во текот на изминатата камен ладна зима ги дегустирав и си помислив, ако не го пуштат у продажба виново ќе згрешат. Пред некој ден ја проверувам страната www.wine.mk и гледам нови вина од Камник, меѓу кои и Montepulciano 2009, искрено се израдував.
Сортата Монтепулчиано е карактеристична за Италија, додека во Македонија немам информација дека некој ја одгледува оваа сорта освен Камник.

Скопје, ладничко, плоштад, пријатно друштво и добро вино. Сите се согласивме дека ни недостасува „кругчето“ на плоштад дека фали „коцка“, но тоа е, се менуваме ние, се менува и градот. Порано седевме на „кругче“ пиевме Скопско во лето или „бамбус“ со Витач во зима, за по некои 15-20 години да седиме на клупи, пиеме македнско врвно вино од италианска сорта. Разговараме за младоста и хард-кор пристапот кон светот, бунтовноста, слободата и не обзема носталгија, носталгија кон младоста. Дегустирам од винцето и си викам, младоста е безмерно подобра од средновечноста, но ова вино прави носталгијата да е пријатна. На здравје!
Виното е полно со црвени овошки, слатко од капини и цреши, одлично спакувано во дабово буре.

Одлично вино и моја препорака обавезно да го дегустирате со пријатели, носталгијата одлично се вклопува со ова вино.
Chateаu Kamnik Montepulciano 2009

Скопско пиво (точено)

 

Лето, пекол, дури ни девојките разголени не делуваат привлечно на вакво време. Но затоа на ладна кригла не може да се одолее.

Точеното скопско за разлика од флаша, лименка или пластика може да биде навистина пријатно изненадување доклку е сервирано и послужено на вистински начин. Кригла од замрзнувач, заледена, камен. Пивото одлично карбонизирано и најважно тазе буре. Пивото вака послужено е деликатес, перверзија.

Пивото изгледа совршено. Пената е густа, кремаста и се задржува повеќе од 5 минути. Вкусот изненадувачки добар, јачменов слад, освежителни цитрусни ноти и горчлив хмељ. Сето ова зачинето со одлична карбонизација која го заокружува ова пиво и го прави совршено летно освежување.

Значи правилно третирано точено скопско пиво е во најмала рака пет пати подобро од останатите варијанти на ова пиво. Ваквото пиво го претвора и најжешкиот ден во згодна девојка разголена на првото пролетно сонце.
Уживајте.
Скопско пиво (точено)

Kenbach Premium Beer

 

Битолска пивара повторно во погон. Одлични вести за љубителите на пивото, но уште поважно и пивото е добро. Kenbach е пиво кое се произведува само од јачменов слад, без додавање на незасладувани житарици, вода, квасец и хмељ. Сладот доаѓа од Хрватска, хмељот од Словенија, квасецот од Германија, водата е локална пелистерска, сето тоа склопено со германска технологија. Браво за чистотата на пивото и недодавањето на незасладувани житарици, тоа сигурно ќе придонесе за квалитетот на пивото.

Пивото е класичен Пилснер, со светло златна боја, кремаста пена и изразена арома на малт со малку цитрус во позадина. Јачменот добро функционира во комбинација со цитрус и горчната на хмељот, што ви остава пријатна свежина во устата. Пивото има средно-висока карбонизација која придонесува за аромите и вкусовите да бидат поистакнати, но истотака и додава освежителен карактер на ова пиво. Финишот е краток и свеж. Лесно пиво, убаво склопено, едностано и ароматично. Ги надмина моите очекувања.
Интересно ќе биде да се види како ќе пројде во Скопје ова пиво, но јас мислам дека ќе се ладам во топлите скопски денови со битолско Кембах пиво.
На здравје!
Kenbach Premium Beer

Skopsko Radler Lemon (Скопско Радлер)

Нема многу да објаснувам и веднаш ќе ви кажам, Скопско Радлер е ТАПА.
Без разлика дали сакате или не сакате алкохолен пијалок, покрај плажа или пак во топол летен ден, ова не е добар пијалок за освежување. Подобро ќе поминете со Степ Лајт растворен во газирана вода одколку со Скопско Радлер. Пиво во радлерот има далеку помалку од оние 40 % кои се наедени на пакувањето, според мое мислење, или пак се работи за неквалитетно пиво бидејќи едвај, скоро воопшто, не се чувствува во ова “сокче“ од Скопско.

Купете си Швепс не се заебавајте со Скопско Радлер!
Поздрав.
Skopsko Radler Lemon (Скопско Радлер)

Kenbach Premium Beer

Битолска пивара повторно во погон. Одлични вести за љубителите на пивото, но уште поважно и пивото е добро. Kenbach е пиво кое се произведува само од јачменов слад, без додавање на незасладувани житарици, вода, квасец и хмељ. Сладот доаѓа од Хрватска, хмељот од Словенија, квасецот од Германија, водата е локална пелистерска, сето тоа склопено со германска технологија. Браво за чистотата на пивото и недодавањето на незасладувани житарици, тоа сигурно ќе придонесе за квалитетот на пивото.

Пивото е класичен Пилснер, со светло златна боја, кремаста пена и изразена арома на малт со малку цитрус во позадина. Јачменот добро функционира во комбинација со цитрус и горчната на хмељот, што ви остава пријатна свежина во устата. Пивото има средно-висока карбонизација која придонесува за аромите и вкусовите да бидат поистакнати, но истотака и додава освежителен карактер на ова пиво. Финишот е краток и свеж. Лесно пиво, убаво склопено, едностано и ароматично. Ги надмина моите очекувања.
Интересно ќе биде да се види како ќе пројде во Скопје ова пиво, но јас мислам дека ќе се ладам во топлите скопски денови со битолско Кембах пиво.
На здравје!
Kenbach Premium Beer

Tikves Barovo Muscat Ottonel 2010 & Sauvignon Blanc 2010

Македонија можеби нема многу голем потенцијал за бели вина, но со труд, знаење и технологија можат да се постигнат солидни резултати. Таков е примерот со Тиквеш Барово. Одбрани лозови насади од областа Барово на Кожув, внимателно контролирани лози стари повеќе од 35 години, одлични енолози и лимитирана серија од 13,000 шишиња донесуваат резултат.

Мускат Отонелот е ароматично вино со цитрусни-овошни и цветни ароми. Пријатно убаво избалансирано, свежо со малку горко-киселкаст послевкус.

Совињон Бланк е сорта која потешко успева во нашава клима, но сепак во Тиквеш завршиле добра работа. Хармонично, свежо, вкусно. Малку преизразени слатки ноти за оваа сорта, но ова е Македонија, а не Нов Зеланд, па затоа не очекувајте премногу. Се вкупно добра работа од Тиквеш.
Ги препорачувам и двете вина како прекрасно освежување за сезоната пролет-лето и незаборавете виното секогаш е подобро кога ќе го “спарите“ со соодветна храна. Експериментирајте и најдете ја вашата идеална комбинација.
На здравје!
Tikves Barovo Muscat Ottonel 2010 & Sauvignon Blanc 2010

Chateau Kamnik Cuvee Kamnik 2008

Лига на шампиони, одлично друштво, мезе и одлично вино, може ли човек да посака повеќе. Дури и фудбалот е подобар со добро вино. Шато Камник Куве 2008 во извонредно пакување од 3 литра, со чепче кое не пропушта воздух во пакувањето, не дозволува виното да оксидира и виното останува свежо подолого време.

Виното е купажа на Sangiovese, Nebbiolo, Syrah, Primitivo и Aglianico, комбинација која функционира одлично и секоја чест на енолозите во Камник кои го склопиле ова вино. Прекрасна арома на рибизла, капина, чоколадо, црн бибер, вкусот истотака комплексен,црни овошки со примеси на даб, финишот долг и ароматичен. Бидејќи се чивствува дека виното е одлежувано во буре, ме интерисира на кој начин е правена купажата и одлежувањето. Дали најпрво се одлежувани вината, посебно по сорта, во буриња или е предходно направена купажата, па потоа виното е одлежувано. Во секој случај направена е одлична работа и виното е навистина добро. Кога ќе се погледне цената од окулу 850 денари за 3 литра и ако таа се подели на флаша од 0,7 литри, колку што е пакувањето на вино во флаша, ќе дојдеме до цена од окулу 200 денари, што според мое мислење ова е најдоброто вино во Македонија со таа цена. За 200 денари не можете да купите подобро вино и мислам доколку ова вино се продава во флаша цената комотно би можела да му биде окулу 400 денари.
П.С.
Имам во визба Chateau Kamnik Cuvee Kamnik 2009 во пакување од 5 литра, дегустација закажана за реванш натпреварот Реал-Баерн.

Chateau Kamnik Cuvee Kamnik 2008

Bovin Chardonnay 2011

Бовин Шардоне берба 2011 е вино кое неодамна беше наградено на Chardonnay du Monde со сребрен медал. Треба да се напомене дека Македонија на овој натпревар освои три сребрени медали со што е најуспашна земја во регионов.

Шардонето на Бовин е стварно добро, одличен баланс помеѓу благото и киселото. На мирис веднаш ги чувствувате мириси на зрело тропско овошје, но и прекрасни свежи мириси на јаболко, круша и лимон. На вкус продолжува солидниот баланс, иако преовладуваат сладките ноти виното ја задржува свежината. Телото е полно и финишот е долг и постојан со прекрасни нежни киселини кои ја неутрализираат сладкоста.
Заслужено сребро за Бовин.
П.С.
Јас го „спарив“ со домашно печено пиле и функционираше одлично.
Bovin Chardonnay 2011

Потрага по совршена Шкембе чорба (Гостилница Кај Перо)

“Кај Перо“ е познатo како место во кое после работа се иде да се накркаш и да се напиеш како човек. Сум бил повеќепати и искрено хранта не е нешто особено вкусна, но има убава атмосвера и бидејќи се оди со друштво, секогаш убаво сум поминувал.
Убаво пролетно утро, јас желен за шкембе чорба и ете ме мене кај Перо.

Чорбата не изгледа многу примамливо, но мириса одлично. Вкусот има домашен шмек, не премногу зачинета, без многу зарават, но некако пријатна, лесна и вкусна. Лепчето тазе, солидно. Убав појадок во центарот на Скопје, заминав задоволен и најаден.
Цена на чорбата со лепче: заборавив
Шкембе оценка: 6,5 од 10.

Потрага по совршена Шкембе чорба (Гостилница Кај Перо)

Потрага по совршена Шкембе чорба (Ресторан Скопски Мерак)

Локацијата на ресторанот Скопски Мерак е во познатотот скопско Дебар Маало, веднаш позади ОУ Коле Неделковски. Терасата е одлична, убаво средена, келнерите љубезни и брзи (нормално утро е, незнам какви се навечер). Чорбата послужена со тазе домашно лепче, оцет со лук, павлака и чаша ладна вода.

Чорбата мириса одлично. Текстурата и е повеќе супеста отколку чорбеста и веднаш се приметува недостаток на зарзават. Вкусот добар, шкембето кремасто, убаво сварено. Ви останува во уста некој чуден aftertaste што мислам дека е баш последица на недовлоно зачини и зеленчук во чорбата. Во позадина се слуша детскиот џагор од училиштето, во ресторанот некоја од оние боса нова преработки на рок песни, а и утринско пролетно сонце функционира одлично со чорбата. Иако според напишаното изгледа дека чорбата не ми се допадна, баш е спротивното, чорбата е добра, солидна. Поради одличната локација на ресторанот и убавата тераса ја препорачувам.
Шкембе оцена: 7 од 10.

Потрага по совршена Шкембе чорба (Ресторан Скопски Мерак)

Нома на точка на вриење (Noma at Boiling point)

Документарец за најдобриот ресторант во светот чии сопственик и главен кувар е Рене Реџепи кој потекнува од Македонија. Интересна приказна која ви овозможува да видите колку е суров, напорен, тежок патот до успехот и да видите како професионалното однесување на една куварска екипа може да донесе еден ресторан на врвот на светот.
Уживајте.

 

Нома на точка на вриење (Noma at Boiling point)

Потрага по совршена Шкембе чорба (Ресторан Дојрана)

Потрагата продолжува, на ред ресторанот Дојрана кој се наоѓа во населбата Керамидница. Ресторанот не е на некоја атрактивна локација, но кога и да појдам секогаш е полн што е добар знак за еден ресторан. Сонце, мириса на пролет, птиците пеат, разеленува природата, девет часот наутро, време е за Шкембе чорба.

Послужена со тазе печено домашно лепче, лук во маслиново масло и чаша ладна вода. Чорбата мириса извонредно, има одлична кашаста конзистенција, доволно зарзават и изгледа примамливо. Вкусна, полна чорба, која воопшто не е тешка, има освежувачка нота поради зеленчукот кој го има во неа. Лепчето е „меко како душа“ макнуваш во чорбата, ги впива вкусовите, совршено. Недостаток е тоа што шкембето е исецкано во поголеми парчиња, мислам навистина големи парчиња, но и тоа не е некој проблем бидејќи е совршено сварено и можете со лажицата да го „пресечете“. Повторно не сум сигурен дека шкембето е свежо т.е. несмрзнато, но и без тоа оваа чорба е една од подобрите кои сум ги вкусил.
Се не се одлична чорба, убав амбиент на терасата од ресторанот, одлична услуга и најважно од се, одлична шкембе чорба.
Шкембе оценка: 8,5 од 10,
Одлична е шкембе чорбата во Дојрана, ја препорачувам. Но потрагата продолжува понатаму.

Потрага по совршена Шкембе чорба (Ресторан Дојрана)

Потрага по совршена Шкембе чорба (Хотел Бристол)

По многу препирки и натегања каде има најдобра шкембе чорба во Скопје, решив да тргнам во потрага, без никакви предрасуди и субјективно да ја најдам, мојата совршена шкембе чорба.
Потрагата решив да ја започнам во култниот скопски хотел Бристол.
Терасата покрај калдрмата на ул. Македонија со поглед кон старата железничка станица, под убав стар орев е можеби една од најубавите тераси во градот, но за жал слабо посетувана. Веднаш по масите и чаршавите се чуствувате како да сте се вратиле негде на почетокот на деведесттите. Конобарот скоцкан со лептир машна ве пречекува и сместува, несоодветно љубезно за денешни услови, ве прашува за вашата желба и извонредно брзо шкембе чорбата беше послужена на мојата маса. И повторно како да патувате со временска машина, сервисот, приборот, дури и парчињата леб како да се од деведесеттите.

Чорбата солидна. Не е класична густа чорба, некако во средина помеѓу супеста и чорбеста. Шкембето беше убаво сварено и исецкано со убава текстура, не не бев баш убеден дека е свежо шкембето. Свежо мислам на несмрзнанувано шкембе кое потешко се наоѓа во денешно време, но тоа е еден од основните мои услови за совршена шкембе чорба. Јас мојата чорба ја љубам со оцет и лук, придружена со тазе подготвен домашен леб.
Значи да заклучам во Бристол чорбата е солидна, но е далеку од совршена. Има неколку основни недостатоци, но мислам дека сепак е доживување да се седне на терасата рано наутро и да се пропатува малку назад низ времето.
Шкембе оценка: 6 од 10.
Потрага по совршена Шкембе чорба (Хотел Бристол)

Мексикански појадок

Прекрасен и лесен рецепт за старт на денот. Можеби повеќе одговара за во сабота наутро, заедено со вашиот партнер/ка, пролет надвор, пријатна музика… мх, мх мх. Имајте на ум, па изнанадете некого.
Еве ви го рецептот:
1 јајце
2 тортиљи
1 парче сланина
1-2 лажички пире од црн грав (пире од црн грав)
1 лажица Мексиканска салца (Мексиканска салца)
малку рендан кашкавал
сол и бибер.

Мексикански појадок
Рецептот и видеото се превземени од еден од моите омилени блогови за храна http://www.talerka.ru

Пријатен појадок

Fine Wine Night (Bovin, Dudin & Santa Christina)

Пред некоја вечер за моите блиски пријатели оргнизирав винска вечер. Извадив од визба три примероци кои мислев дека одлично ќе одат еден по друг, направив мезе (различни видови на тапас со чаден врат, пекорино македонико, горгонзола, рокфорд, кулен…) и подготвив пријатен амбиент. Ова се вината кои ги дегустиравме.
Започнавме со Бовин Дарон 2003, купажа од Каберне, Мерло и Вранец, перфектно зреено кај мене во визба во одлични услови.

На мирис полно со суво овошје, сливи, боровинки и интересна нота на кафе, која продолжува да се чувствува и на вкус. Одлично очувано вино иако 9 години старо.
Продолживме се ѕвездата на вечерта Дудин Акрато Барик Мерло 2006.

Уште на мирис ви открива дека се работи за извонредно и префинето вино на кое треба да му се посвети внимание. Аромата на даб помешана со црни и црвени овошки зачинета со малку суво грозје и сува смоква, перверзија. Полно тело и вкусови експлодираат во устата, а финишот е долг и фантастичен.
За крај отворивме едно Кјанти на Санта Кристина од 2008.

Виното е сеуште свежо и се чуствуваат ароми на цреша и јагода. На вкус е исто така овошно, но со изразени танини, земјест вкус и во финишот интересни зачини кои остануваат подолго и потсетуваат како да сте лижнале кожна ракавица.
На крајот завршивме со по една пура Партагас Де Лукс која легна извонредно со Кјантито.
Морам да ви кажам дека доколку било кое од овие вина ги купите денес од маркет или било која продавница и го немаат сето она што јас го опишав, немојте да ме обвинувате мене. Тоа се должи на зреењето во мојата визба која има скоро идеални услови во текот на целата година, лето до 18 степени и во зима до 10 степени, што му дозволува на виното да созрева постепено и обично се добиваат извонредни резултати. Во маркетите температурата се движи помеѓу 20 и 30 степени што воопшто не е добро за виното и неговото зреење.
И немојте да заборавите, пијте малку, но пијте квалитетно!
Fine Wine Night (Bovin, Dudin & Santa Christina)

Liefmans Cuvée Brut

Ова пиво е специфично по многу нешта, но едно е сигурно, вкусот и мирисот му се фантастични.
Се започнува со темно пиво во кое се додаваат свежи цреши, на секои 100 литра пиво се додадаваат 13 килограми свежи цреши. Потоа пивото одлежува 1 година за на крај да се додадат уште две одлежани темни пива за да се добие финалната купажа.

Веднаш по отворањето собата ви се исполнува со мирис на цреша, свеж , силен, пријатен мирис. Во позадина се чувствува мирис на буре и мирис на џем (јагоди и сливи). Вкусот на киселкасто-слатка цреша ја исполнува устата уште во првата голтка, потоа се чуствуваат омекнатите танини од бурето, малт и сладолед од цреша. Прекрасно кремасто чувство во устата со средна карбоизација која придонесува за потикнување на вкусовите. Финишот е средно долг, малку киселкаст и остава убав впечаток на свежина.

Извонредно пиво кое би одело одлично со било каков десерт кој содржи цреши, вишни, јагоди или сливи. Ова е едно од оние пива кои секогаш сакате да ги имате во фрижидер.
Liefmans Cuvée Brut

Fantinel – Vigneti Sant’Helena Refosco del Peduncolo Rosso DOC 2007

Рефоско е стара италианска сорта на грозје, која се смета за автохтона за регионите Фриули, Грави, Трентино, Истра (Хрватска) и Крас (Словенија).

Виното е извонредно, ако не сте го пробале еве одлична можност Св. Трифун да го прославите со прекрасно вино.

Виното го декантирав 30 мин. пред пробувањето и аромата која ме “удри„ по првото принесување на чашата кон носот беше совршена комбинација на суви црвени овошки, џем од слива и прекрасна нота на свежа црвена рибизла. На вкус моќно, полно тело со совршен баланс помеѓу киселото и слаткото, зачинето со бел бибер, ванила… одлично. Долго финале и чувство кога морате повторно да ја подигнете чашата и да наздравите. Виното поминало 18 месеци во буриња од Славонски даб што му дава р’бет на ова вино, текстура, прапознатливост. Браво за Фантинел кои за пристапна цена ни овозможуваат да пробаме врвно вино.  Наздравје и за многу години.
Fantinel – Vigneti Sant’Helena Refosco del Peduncolo Rosso DOC 2007

VAT 69

VAT 69 е шкотско виски (бленд) кое е произведено од William Sanderson & Son Limited. Креатор на ова виски е основачот на компанијата William Sanderson кој во 1882 година направил 100 различни вискија во 100 буриња и поканил пријатели да го пробаат и оценат секое од нив. Бурето со број 69 на крајот било прогласено за најдобро и отаму доаѓа и името VAT 69.
Ова виски можете да го набавите во сите супермаркети и тоа по многу ниска цена, не повиска од 600 денари. Немојте да очекувате многу од овој бленд бидејќи сепак се работи за виски кое на долниот дел од скалата на вредности, но она што ќе го добиете за тие 600 денари е навистина солидно. Бев дури и јас малку скептичен, дали да го купам бидејќи цената не ветува многу, но бидејќи јас не сум виски сноб и давам шанса на сите, собрав храброст и го купив.
Ова се моите забелешки за ова виски.
VAT 69 Blended Scotch Whisky

На мирис прво што ќе осетите е свежина и сладок мирис, кора лимон, карамела, малку бибер и мирис на буре (даб). Во позадина се чувствува нота на ацетон, но не е многу изразена што всушност ја прави пријатна (барем за мене).
Вкусот сладок, но извонредно лесен во устата, нема напад на алкохол, нема многу лутина. Се развива вкус на суво овошје во финишот (грозје, сливи и смокви). Изненадувачки “чисто“ виски, едноставно, но има доволно вкусови и ароми во него да биде интересно за пиење. Според мене ова е извонредно виски за почетници, а и цената е извонредна. Моја препорака.
VAT 69

Big Peat

Big Peat е Шкотско виски или поточно бленд од малтови. Вискито кое се наоѓа во овој бленд е реномираните дестилерии на островот Ајла (Islay), а тоа се Ардбег (Ardbeg), Кол Ила (Caol Ila), Бомор (Bowmore) и изненадувачки, од затворената дестилерија Порт Елен (Port Ellen) чие виски е многу ценето во кругот на познавачите на сингл малт вискито. Во ова виски преовладува чадот и тресетот, што е всушност и одлика на вискиото кое доаѓа од регионот на Ајла, но исто така има прекрасни ноти на суви овошки, лути зачинии и солена морска трева.
Ова се моите забелешки за Douglas Laing & Co Big Peat Blended Malt 46% ABV.



Бидејќи ова виски не е ладно филтрирано ќе приметите ситни честички во него и доколку додадете неколку капки вода во вискито тоа ќе стане матно, но тоа не е ништо лошо. Напротив тоа е нормално кај ваквото виски кое познавачите велат дека е подобар начин бидејќи се зачувуваат повеќе есенциални вкусови и ароми.
На мирис веданш се чувствува чадот од тресет, но не во голема количина. Во позадина се зачините и мирисот на морето. Вкусот одличен, соленкаст помешан со прекрасниот чад и прикриени ноти на даб. Финишот е долг и ја навлажнува устата какошто се враќаат вкусовите. Ова е дефинитивно е суво, прекрасно, фенолично, тресетно, чадено виски од Ајла. Обавезно да се проба ако сте љубители на ваквиот стил на виски.
Оцена: 89/100 за Blended Malt
Big Peat

Tristo Cabernet Sauvignon 2006

Винаријата Тристо се наоѓа на прекрасна локација во близина на Велес, поточно во атарот на село Сујаклари. Оваа мала семејна винарија произведува одлично вино во мали количини или како што тие велат “за своја душа„. Виното го произведуваат единствено од сопствени лозови насади. Нивната палета е составена од три вина и тоа: шардоне, розе (пино ноар) и каберне совињон. Инаку е можеби еднинствената македонска винарија која вади младо вино или како што французите го нарекуваат “божоле нуво„.
Јас ќе се фокусирам на каберне совињонот од 2006 кој одлежал најмалку една година во дабови буриња, па потоа уште два години во винаријата во шише и на крај уште 2 години кај мене во визба.

Виното еден ден пред отворање го ставив во исправена положба бидејќи забележав мала количина на седимент во шишето. По отворањето го декантирав, но не долго, туку само го преточив во декантер да дојде малку во контакт со воздух.
Виното беше во извонредно добра состојба. Темно црвена боја во која почнуваат да се приметуваат нијанси на “цигла„ поради зреењето. Прекрасен мирис на суви сливи, капини, боровинки и суптилни зачински тонови. На вкус џем од црни и црвен бобинки, зачинет со цимет и чад. Послевкусот средно долг кој ги задрчува овошните тонови но со нагласен чад. Солидно вино кое мислам дека го има достигнато врвот во моментов и дека со понатамошно зреење нема да добива на квалитет. Според мене ова вино би одело одлично со печено прасечко.
Tristo Cabernet Sauvignon 2006

Leute Bok

Leute Bokbier е произведено во пивницата Van Steenberge во Белгија. Бок стилот е инаку првпат произведен во 17 век во Германија, поточно од Пауланер монасите. Leute Bok e силно пиво со 7,5% алкохол и се нарекува Doppelbock што е всушност посилна верзија на Бок стилот. Leute Bok е пиво кое содржи активна култура (квасец) во себе и со секундарна ферментација во шишето тоа го менува вкусот со тек на времето, нешто слично на виното. Ако го сакате пивото малдо и свежо го пиете веднаш, но доколку сакате посилно и поинтензивно пиво тогаш треба да го чувате пивото од 12 до 18 месеци на сличен начин како и виното и ќе почуствувате голема разлика како во вкусот така и во изгледот на пивото, кое со тек на времето станува потемно. Инаку кај нас можете да ја најдете допелбок верзијата на Paulaner наречена Salvator, пиво кое го има во поголемите супермаркети во градов.
Ова се моите забелешки за Leute Bokbier 7.5% abv.

Пивото има темна кафена боја на прв поглед, но доколку го изложите на светлина ќе приметите црвена, како цигла, нијанса во него. Пената е цврста и ова пиво навистина изгледа добро во чашата.
На мирис прво се чуствува малтот, а во позадина прекрасни ноти на суво овошје, сливи, јаболка, смокви, грозје…
Средна карбонизација која извонредно “легнува„ во устата создавајќи кремаст ефект.
Вкусот го продолжува она што го најави на нос со многу суви овошја, јачменов малт, карамел, печен костен, малку хмељ и зачини во средно долгиот финиш.
Солидно пиво во кое воопшто не сечувствува алкохолот, лесно и верувам одлично би одело со македонска скара.
Leute Bok

Delirium Tremens

Delirium Tremnes е Белгиско пиво произведено од Brouwerij Huyghe. Brouwerij Huyghe е формирана во 1906 година од Leon Huyghe во малото место Melle во Источна Фландрија.


Пивото е специфично не само по името и пакувањето, туку и поради специфичниот начин на подготовка. Пивото се добива со ферметација во три фази со три различни квасци, последната ферметација се одвива во самото шише по точењето.
Ова се моите забелешки за Delirium Tremens 8.5% Alc.

Светло жолта боја со прекрасна “глава„ која по исчезнувањето остава трага на чашата.
Мирисот е феноменален. Извонредно свеж, зелени сливи, бело грозје измешано со мирисот на квасецот. Мирис многу сличен на квалитетно бело вино. Ако го оставите подолго време во чашата почнуваат да се чувствуваат прекрасни мириси на зачини и интересни ноти на разблажен јод споен со хмељот функционира перфектно.
Вкусот е исто така прекрасен. Кремасто “средно„ тело кое ја прекрива целата усна шуплина, одлична карбонизација која помага да се развијат прекрасни вкусови. Свежо, “крцкаво„ овошно на почетокот, потоа малтот ја преземе главната улога заедно со хмељот. Зачините во финишот заедно со алкохолот го заокружуваат ова прекрасно пиво.
Едно од моите омилени пива кои би можел да ги конзумирам секој ден. Delirium Tremnes е Шампањ помеѓу пивата, свежо но извонредно комплексно.
Delirium Tremens

Paulaner Hefe-Weissbier Dunkel

Пауланер е Минхенска пивара формирана во 1634 година од италианскиот монах по име Францис од Паола.

Пауланер е едно од најпродаваните пива во Германија и е едно од најкомерцијаните поготово познато како официјално пиво на фудбалскиот клуб Баерн од Минхен.


Hefe-Waissbier Dunkel можеби не ви значи многу па еве едно кратко објаснување што всушност сакал да каже производителот на ова прекрасно пиво.
Weissbier на германски значи “бело пиво„ и се употребува за пивата кои во својот состав содржат повеќе пченица отколку јачмен. Исто така се употребува и Weizenbier што во превод значи “пченично пиво„. Според Германскиот закон за пиво сите “бели пива„ произведени во Германија мораат да бидат со горна ферментација.
Hefe на германски значи квасец и означува дека пивото не е филтрирано пред точењето оставајќи во пивото парчиња од квасецот кој ја помага ферментацијата што го прави пивото “матно„.
Dunkel во превод е темно што значи дека е произведено од пржена пченица и јачмен што му дава на пивото темна боја и препознатлив вкус.
Ова се моите забелешки за Paulaner Hefe-Weissbier Dunkel.

Темна кафена боја со нијанси на бакар, матно и со убава пена “глава„ која брзо исчезнува.
На мирис веднаш се чувствуваат овошните ноти кои се специфични кај сите пченични пива. Банана, зачини, мирис на тазе печен леб, а во позадина суптилни ноти на каранфилче и карамела.
Вкусот е сличен како и мирисот. Преовладуваат нотите на “чоколаден малт„ измешани со банана, цитрусни свежи ноти и специфичен вкус на квасец. Пиво со средно тело и одлична карбонизација.
Финишот започнува слатко со вкус на банана и карамела, а завршува суво со ноти свежо тесто и квасец.
Одлично пиво кое иако е темно сепак ја има задржано свежината и поради солидната карбонизација мислам дека може да се конзумира и во текот на летниот период.
Paulaner Hefe-Weissbier Dunkel

Heineken

Бренд кој е познат на сите, еден од најголемите производители на пиво во светот, Хајнекен.

Хајнекен интернционал е со седиште во Амстердам, но Хајнекен пивото се произведува во преку 70 држави со годишно производство од 139 милиони хектолитри. Компанијата е формирана во 1864 од Жерар Адриан Хајнекен и почнала со призводство на пиво со горна ферментација односно ејл.  Во 1869 пиварата почнува со произвотство на пиво со долна ферментација, а во 1886 Доктор Х. Елиот, ученик на Луј Пастер, го создава кваасецот “Хајнекен А„ кој и денес се користи за фермантација на пивото.

Историските факти, приказните  и маркетингот се можеби најсилите адути на Хајнекен, бидејќи пивото им е … медиокритет.

Еве ги моите забелешки за Heineken Lager (лименка):
Бојата му е бледо жолта, формира малку пена која брзо исчезнува.
На мирис нема многу пријатни ноти, житарки, сено, суптили ноти на малт…
Вкусот е исто така “досаден„. Корнфлекс, малку горчина од хмељот, многу малку малт и чудна “метална„ нота во финишот е одприлика се што успеав да детектирам. Финишот е краток и ви остава горчина од хемељ во устата.

Пивото е просечно, но и неможе да се очекува повеќе од еден производ кој се произведува во толкава количина. Ако се одлучите да го конзумирате би ја препорачал лименката бидејќи Хајнекенот во флаша има некој лош, чуден мирис. Јас не го конзумирам често, мислам дека е прескап (64 денари лименка 0,5 литри).
Се на се подпросечно пиво со висока цена и добар маркетинг (симнувам капа за маркетингот)
Heineken